ایران سے دوبارہ جنگ کیلئے تیار ہیں: نیتن یاہو کی ہٹ دھرمی

اسرائیلی وزیراعظم بنجمن نیتن یاہو نے ایک بار پھر ہٹ دھرمی کا مظاہرہ کرتے ہوئے نو آموز جنگ بندی کو سبوتاژ کرنے کی دھمکی دے دی ہے۔ اپنے تازہ بیان میں نیتن یاہو نے واشگاف الفاظ میں کہا ہے کہ اسرائیل ایران کے ساتھ دوبارہ جنگ شروع کرنے کے لیے مکمل طور پر تیار ہے اور ان کی “انگلیاں ٹریگر پر ہیں”۔ انہوں نے واضح کیا کہ ایران کے ساتھ ہونے والی اس جنگ بندی میں حزب اللہ شامل نہیں ہے اور اسرائیل اپنے بقیہ اہداف حاصل کرنے کے لیے طاقت کے استعمال سے گریز نہیں کرے گا۔

نیتن یاہو کا مزید کہنا تھا کہ جنگ بندی کا معاہدہ محض ایک وقفہ ہے، اختتام نہیں، اور اسرائیل کا اصل مقصد ایران سے افزودہ یورینیم کا مکمل خاتمہ ہے، چاہے وہ معاہدے کے ذریعے ہو یا دوبارہ جنگ چھیڑ کر۔ اسرائیلی وزیراعظم کے اس جارحانہ بیان نے خطے میں پائیدار امن کی کوششوں پر سوالیہ نشان لگا دیا ہے، جبکہ دوسری جانب لبنان پر حالیہ بمباری ان کے اس موقف کی تصدیق کر رہی ہے کہ وہ اس معاہدے کو محدود پیمانے پر دیکھ رہے ہیں۔ اس بیان کے بعد مشرقِ وسطیٰ میں کشیدگی کے ایک نئے دور کے آغاز کا خدشہ پیدا ہو گیا ہے۔