وزیراعظم کا اماراتی بندرگاہ پر حملے میں پاکستانی شہریوں کے زخمی پر اظہارِ تشویش

وزیراعظم شہباز شریف نے متحدہ عرب امارات کی خور فکان بندرگاہ پر ہونے والے میزائل اور ڈرون حملوں کے نتیجے میں پاکستانی شہریوں کے زخمی ہونے پر گہری تشویش کا اظہار کیا ہے۔ سوشل میڈیا پلیٹ فارم ‘ایکس’ پر جاری اپنے بیان میں وزیراعظم نے کہا کہ پاکستان اس مشکل گھڑی میں اماراتی بھائیوں کے ساتھ مکمل یکجہتی کا اظہار کرتا ہے اور زخمی پاکستانیوں کی ہر ممکن معاونت کے لیے مقامی حکام سے قریبی رابطے میں ہے۔ اماراتی میڈیا آفس کے مطابق فضائی دفاعی نظام نے ایرانی میزائلوں اور ڈرونز کو کامیابی سے فضا میں ہی تباہ کر دیا، تاہم ان کا ملبہ گرنے سے بندرگاہ پر آگ لگ گئی جس کے نتیجے میں تین پاکستانی اور ایک نیپالی شہری زخمی ہوئے۔ متحدہ عرب امارات کی وزارتِ دفاع نے واضح کیا ہے کہ ملک بھر میں سنی جانے والی دھماکوں کی آوازیں دفاعی نظام کے فعال ہونے کی وجہ سے تھیں، جبکہ وزیراعظم شہباز شریف نے خطے میں بڑھتی ہوئی کشیدگی کو کم کرنے اور تمام فریقین کو تحمل مزاجی اختیار کرنے کی ضرورت پر زور دیا ہے۔