پاکستان، مصر اور ترکیہ ایران کو مذاکرات کیلئے منا رہے ہیں: وال سٹریٹ جرنل

امریکی اخبار وال اسٹریٹ جرنل نے دعویٰ کیا ہے کہ پاکستان، مصر اور ترکیہ مشرقِ وسطیٰ میں جاری کشیدگی کو ختم کرنے اور امریکہ و ایران کو مذاکرات کی میز پر لانے کے لیے پسِ پردہ سرگرمِ عمل ہیں۔رپورٹ کے مطابق، تینوں اہم مسلم ممالک—پاکستان، مصر اور ترکیہ—اس وقت خطے کو ایک بڑی جنگ سے بچانے کے لیے شدید سفارتی کوششیں کر رہے ہیں۔ ان کوششوں کا بنیادی مقصد فریقین کے درمیان غلط فہمیاں دور کرنا اور ایران کو امریکی شرائط پر مذاکرات کے لیے آمادہ کرنا ہے تاکہ کسی بڑے فوجی تصادم کو روکا جا سکے۔وال اسٹریٹ جرنل کا کہنا ہے کہ ان تمام تر سفارتی کوششوں کے باوجود اب تک کوئی بڑی پیشرفت سامنے نہیں آئی ہے۔ ذرائع کے مطابق، ایران نے امریکہ کا ‘آبنائے ہرمز’ کھولنے کا مطالبہ دو ٹوک الفاظ میں مسترد کر دیا ہے۔ تہران کا موقف ہے کہ وہ کسی بھی بیرونی دباؤ کے تحت اپنی تزویراتی پوزیشن پر سمجھوتہ نہیں کرے گا۔تجزیہ کاروں کے مطابق، پاکستان، مصر اور ترکیہ کی یہ مشترکہ کوششیں جنگ بندی کا “واحد اور آخری موقع” ثابت ہو سکتی ہیں۔ صدر ٹرمپ کی حالیہ سخت دھمکیوں کے بعد خطے میں فوجی کارروائی کے بادل منڈلا رہے ہیں، اور اگر یہ سفارتکاری ناکام ہوئی تو صورتحال مزید سنگین ہو سکتی ہے۔

عالمی برادری کی نظریں اس وقت ان تینوں ممالک کی کوششوں پر لگی ہوئی ہیں، کیونکہ ان کی کامیابی ہی عالمی معیشت اور توانائی کی ترسیل کے اہم ترین راستے، آبنائے ہرمز، کو محفوظ بنا سکتی ہے۔