پی سی بی کا کھلاڑیوں کو ‘ریڈ سگنل’: سینٹرل کنٹریکٹ کی خلاف ورزی پر سخت ایکشن کا انتباہ

لاہور: پاکستان کرکٹ بورڈ (PCB) نے سینٹرل کنٹریکٹ میں شامل کھلاڑیوں کو قواعد و ضوابط کی سختی سے پابندی کرنے کی آخری وارننگ جاری کر دی ہے۔ ذرائع کے مطابق، بورڈ نے واضح کیا ہے کہ کسی بھی کھلاڑی کو پی سی بی کی پیشگی اجازت کے بغیر سوشل میڈیا پر کوئی بھی پوسٹ لگانے کی اجازت نہیں ہوگی۔

یہ سخت ہدایات اس وقت سامنے آئی ہیں جب قومی فاسٹ باؤلر نسیم شاہ کی جانب سے مبینہ طور پر سینٹرل کنٹریکٹ کی خلاف ورزی کرتے ہوئے وزیراعلیٰ پنجاب کے خلاف ایک ٹویٹ کی گئی، جس پر بورڈ حکام نے سخت برہمی کا اظہار کیا ہے۔ پی سی بی نے نہ صرف کھلاڑیوں بلکہ ان کے پروفیشنل منیجرز کو بھی نئی گائیڈ لائنز کے حوالے سے باضابطہ طور پر آگاہ کر دیا ہے تاکہ مستقبل میں ایسے واقعات سے بچا جا سکے۔

ذرائع کا کہنا ہے کہ پی سی بی اپنے کھلاڑیوں کو مکمل طور پر غیر سیاسی اور پیشہ ورانہ طرزِ عمل تک محدود رکھنا چاہتا ہے۔ نئے ضابطہ اخلاق کے تحت، کھلاڑیوں کی ڈیجیٹل سرگرمیوں کی مانیٹرینگ بڑھا دی گئی ہے اور خلاف ورزی کرنے والوں کے خلاف جرمانے یا کنٹریکٹ کی معطلی جیسی سزائیں تجویز کی گئی ہیں۔