پی ایس ایل 11: گیند سے چھیڑ چھاڑ ، فخر زمان کو لیول تھری جرم پر چارج

پاکستان سپر لیگ (PSL) کے 11ویں ایڈیشن میں بال ٹیمپرنگ کا بڑا تنازع کھڑا ہو گیا ہے، جس کی زد میں لاہور قلندرز کے تجربہ کار کھلاڑی فخر زمان آ گئے ہیں۔ پاکستان کرکٹ بورڈ (PCB) کے اعلامیے کے مطابق، فخر زمان کو کوڈ آف کنڈکٹ کے آرٹیکل 41.3 (گیند کی حالت خراب کرنا) کی خلاف ورزی پر لیول تھری کے تحت چارج کر دیا گیا ہے۔

یہ واقعہ لاہور میں کھیلے گئے پی ایس ایل کے چھٹے میچ میں کراچی کنگز کی اننگز کے دوران پیش آیا۔ میچ ریفری روشن ماہنامہ نے اس معاملے پر ابتدائی سماعت کی، تاہم فخر زمان نے اپنے اوپر لگے الزامات کی سختی سے تردید کی ہے۔ پی سی بی کا کہنا ہے کہ اس کیس کی باقاعدہ سماعت اگلے 48 گھنٹوں میں ہوگی، جس کے بعد میچ ریفری حتمی فیصلہ سنائیں گے۔

واضح رہے کہ اس مشکوک کارروائی کے باعث میچ کے دوران ہی لاہور قلندرز کو 5 رنز کی پنالٹی کا سامنا کرنا پڑا تھا، جو کراچی کنگز کے ٹوٹل میں شامل کر دیے گئے۔ اس میچ میں لاہور قلندرز نے پہلے بیٹنگ کرتے ہوئے 128 رنز بنائے تھے، جسے کراچی کنگز نے آخری اوور میں 4 وکٹوں کے نقصان پر حاصل کر کے قلندرز کو شکست دے دی۔ اگر لیول تھری کا جرم ثابت ہو گیا تو فخر زمان پر بھاری جرمانے سمیت چند میچوں کی پابندی بھی لگ سکتی ہے۔