جیٹ فیول مہنگا، قیمت 471 روپے فی لٹر کی بلند ترین سطح پر پہنچ گئی

ملک میں طیاروں کے جیٹ فیول کی قیمت میں ایک بار پھر بڑا اضافہ کر دیا گیا ہے، جس کے بعد نئی قیمت 471 روپے فی لٹر کی ریکارڈ سطح پر پہنچ گئی ہے۔

ذرائع کے مطابق حالیہ اضافے میں فی لٹر 83 روپے کا نمایاں اضافہ کیا گیا، جبکہ یکم مارچ سے اب تک مجموعی طور پر 283 روپے فی لٹر اضافہ ہو چکا ہے۔

اعداد و شمار کے مطابق یکم مارچ کو جیٹ فیول کی قیمت 188 روپے فی لٹر تھی، جو مسلسل اضافوں کے بعد غیر معمولی سطح تک جا پہنچی ہے۔

ماہرین کا کہنا ہے کہ قیمتوں میں اس تیزی سے اضافے کے باعث ایئرلائنز کے لیے فضائی آپریشن جاری رکھنا مشکل ہو رہا ہے، جبکہ مسافروں کے لیے فضائی کرایوں میں مزید اضافے کا خدشہ بھی ظاہر کیا جا رہا ہے۔

واضح رہے کہ مارچ کے دوران اب تک چوتھی بار جیٹ فیول کی قیمت میں اضافہ کیا گیا ہے۔