ایپل صارفین کے لیے عمر کی تصدیق لازمی قرار

لندن: معروف ٹیکنالوجی کمپنی ایپل نے برطانیہ میں اپنے صارفین کے لیے عمر کی تصدیق کا عمل لازمی قرار دے دیا ہے۔ غیر ملکی خبر رساں ادارے کے مطابق، یہ نئی شرط آئی فون اور آئی پیڈ کے تازہ ترین سافٹ ویئر اپڈیٹ (iOS Update) کے بعد نافذ کی گئی ہے۔ اب صارفین کو مخصوص سروسز اور ایپس تک رسائی حاصل کرنے کے لیے اپنی عمر ثابت کرنی ہوگی۔

ایپل کے سپورٹ پیج کے مطابق، صارفین کو عمر کی تصدیق کے لیے دو آپشنز دیے جائیں گے: یا تو وہ اپنے کریڈٹ کارڈ کی تفصیلات فراہم کریں یا پھر اپنی سرکاری شناختی دستاویز (جیسے پاسپورٹ یا ڈرائیونگ لائسنس) اسکین کر کے اپ لوڈ کریں۔ کمپنی اس ڈیٹا کے ذریعے اس بات کی تصدیق کرے گی کہ صارف کی عمر 18 سال یا اس سے زیادہ ہے۔

یہ اقدام ایک ایسے وقت میں سامنے آیا ہے جب برطانیہ سمیت عالمی سطح پر بچوں کی آن لائن حفاظت (Online Safety) کے حوالے سے بحث تیز ہو رہی ہے اور حکومتیں ٹیک کمپنیوں پر دباؤ ڈال رہی ہیں کہ وہ بچوں کو غیر موزوں مواد سے دور رکھنے کے لیے سخت اقدامات کریں۔ ایپل کا کہنا ہے کہ اس عمل کا مقصد یہ یقینی بنانا ہے کہ بالغوں کے لیے مخصوص سروسز تک بچوں کی رسائی کو روکا جا سکے۔