جیٹ فیول کی قیمتوں میں ریکارڈ اضافہ، ائیرلائن ٹکٹس مزید مہنگے

عالمی سطح پر ایندھن کی بڑھتی ہوئی قیمتوں اور علاقائی کشیدگی کے باعث پاکستان میں فضائی سفر کے کرایوں میں غیر معمولی اضافہ کر دیا گیا ہے۔ جیٹ فیول کی قیمت 388 روپے سے بڑھ کر 472 روپے فی لٹر کی ریکارڈ سطح پر پہنچ گئی ہے، جس کے نتیجے میں اب تک مجموعی طور پر تقریباً 150 فیصد اضافہ دیکھا جا چکا ہے۔

ائیر لائنز نے اگرچہ اپنے بنیادی کرایوں (Base Fares) میں تبدیلی نہیں کی، تاہم ایندھن کے اخراجات پورے کرنے کے لیے بھاری ‘فیول سرچارج’ نافذ کر دیا ہے۔ قومی ایئر لائن (PIA) نے مقامی پروازوں پر 10 ڈالر جبکہ بین الاقوامی روٹس پر کینیڈا کے لیے 100 ڈالر، برطانیہ کے لیے 75 ڈالر اور خلیجی ممالک بشمول سعودی عرب کے لیے 50 ڈالر تک اضافی چارج لاگو کر دیا ہے۔

نجی ائیر لائنز نے بھی اپنے روٹس کے حساب سے 15 سے 150 ڈالر تک کے اضافی سرچارجز کا بوجھ مسافروں پر ڈال دیا ہے۔ ہوا بازی کے ماہرین اور حکام کا کہنا ہے کہ خلیجی فضائی حدود کی بندش کے باعث پروازوں کے طویل راستوں اور مہنگے ایندھن کے دوہرے دباؤ نے کرایوں میں اس اضافے کو ناگزیر بنا دیا ہے۔