آئی ایم ایف کے ساتھ نئے معاہدے کی تیاری: ‘ایم ای ایف پی’ (MEFP) کا مسودہ حکومتِ پاکستان کو موصول

اسلام آباد: عالمی مالیاتی ادارے (IMF) نے پاکستان کے ساتھ نئے اسٹاف لیول معاہدے کی جانب اہم قدم اٹھاتے ہوئے ‘میمورنڈم آف اکنامک اینڈ فنانشل پالیسیز’ (MEFP) کا مسودہ وزارتِ خزانہ کے ساتھ شیئر کر دیا ہے۔ ذرائع کے مطابق وزارتِ خزانہ نے یہ ڈرافٹ تمام متعلقہ وزارتوں اور ڈویژنز کو بھجوا دیا ہے، جن کی تجاویز اور اتفاقِ رائے کے بعد حتمی مسودہ دوبارہ آئی ایم ایف کو ارسال کیا جائے گا۔

اس نئے مسودے میں ایف بی آر (FBR)، وزارتِ توانائی، پیٹرولیم، نیب، اسٹیٹ بینک اور نیپرا سمیت مختلف اداروں کے لیے نئے سخت اہداف مقرر کیے گئے ہیں۔ خاص طور پر زرعی آمدن پر انکم ٹیکس سے متعلق امور بھی اس ڈرافٹ کا حصہ ہیں۔ تاہم، گیس سیکٹر کے 3180 ارب روپے کے گردشی قرضے کی ایڈجسٹمنٹ پر تاحال حکومت اور آئی ایم ایف کے درمیان مکمل اتفاق نہیں ہو سکا ہے۔

حکومت نے اس گردشی قرضے کو کم کرنے کے لیے پٹرولیم لیوی میں 3 سے 5 روپے مزید اضافے کی تجویز دی ہے، جبکہ 6 سالوں میں 1700 ارب روپے کا قرضہ ختم کرنے کا پلان زیرِ غور ہے۔ ذرائع کا مزید کہنا ہے کہ آئی ایم ایف کا ایک تکنیکی وفد آئندہ ماہ کے آخر میں پاکستان پہنچے گا جو اگلے مالی سال کے بجٹ کی تیاری میں وفاقی اور صوبائی اداروں کو تکنیکی معاونت فراہم کرے گا۔