وفاقی حکومت کا ترقیاتی بجٹ میں 100 ارب روپے کی کمی کا فیصلہ

اسلام آباد: وفاقی حکومت نے رواں مالی سال کے دوران وفاقی ترقیاتی بجٹ میں 100 ارب روپے کی بڑی کٹوتی کر دی ہے۔

وفاقی وزیر برائے منصوبہ بندی احسن اقبال نے اس فیصلے کی تصدیق کرتے ہوئے بتایا کہ وزارت خزانہ کی جانب سے سرکاری شعبہ ترقیاتی پروگرام میں 100 ارب روپے کی کمی کی گئی ہے۔

ان کے مطابق رواں مالی سال میں شامل تمام ترقیاتی منصوبوں کے بجٹ میں 10 فیصد کمی کی جائے گی، جس کے نتیجے میں مجموعی ترقیاتی بجٹ کا حجم ایک ہزار ارب روپے سے کم ہو کر 900 ارب روپے رہ گیا ہے۔

حکومت کا کہنا ہے کہ عالمی منڈی کے مطابق پیٹرول اور ڈیزل کی قیمتوں میں اضافہ نہ کرنے کے باعث 72 ارب روپے کی سبسڈی برداشت کی جا چکی ہے۔

وزیر اعظم نے بھی اپنے حالیہ خطاب میں عوام پر ایندھن کی قیمتوں کا اضافی بوجھ منتقل نہ کرنے کے لیے ترقیاتی اخراجات میں کمی کا عندیہ دیا تھا۔