عالمی ریٹنگ ایجنسی ‘فچ’ کا انتباہ: ایران امریکہ جنگ سے پاکستان سمیت ایشیائی ممالک کی ریٹنگ خطرے میں

کراچی: عالمی کریڈٹ ریٹنگ ایجنسی فچ (Fitch) نے ایران اور امریکہ کے درمیان بڑھتی ہوئی کشیدگی اور ممکنہ جنگ کے تناظر میں پاکستان سمیت ایشیائی ممالک کے لیے خطرے کی گھنٹی بجا دی ہے۔ فچ کی تازہ ترین رپورٹ کے مطابق، اگر یہ جنگ طویل ہوتی ہے تو اس کے براہِ راست اثرات ایشیا پیسیفک خطے کے ممالک کی ساورن ریٹنگ (Sovereign Rating) پر مرتب ہوں گے، جس سے ان ممالک کی عالمی ساکھ متاثر ہو سکتی ہے۔

ریٹنگ ایجنسی نے خبردار کیا ہے کہ سال 2026ء کی دوسری سہ ماہی میں خام تیل کی قیمتیں اوسطاً 128 ڈالر فی بیرل تک پہنچ سکتی ہیں۔ توانائی کی ان بڑھتی ہوئی قیمتوں کے نتیجے میں پاکستان، بھارت، جنوبی کوریا اور فلپائن جیسے ممالک میں مہنگائی کا طوفان، تجارتی خسارے میں اضافہ اور معاشی سست روی کا شدید خدشہ ہے۔ رپورٹ میں خاص طور پر آبنائے ہرمز کی ممکنہ بندش کا تذکرہ کیا گیا ہے، جو عالمی سطح پر کھاد اور پیٹرو کیمیکل مارکیٹس کا توازن بگاڑ سکتی ہے۔

فچ کے مطابق، توانائی کے بحران کے باعث کھاد کے کارخانوں کو آر ایل این جی (RLNG) کی عدم فراہمی پورے خطے میں غذائی تحفظ (Food Security) کے لیے سنگین خطرات پیدا کر سکتی ہے۔ ماہرین کا کہنا ہے کہ ریٹنگ میں کمی سے ان ممالک کے لیے عالمی منڈیوں سے قرضوں کا حصول مزید مشکل اور مہنگا ہو جائے گا، جو پہلے سے معاشی دباؤ کا شکار ممالک کے لیے ایک بڑا چیلنج ہوگا۔