“پی ایس ایل 11 میرے لیے اہم ہے، اچھی کارکردگی سے قومی ٹیم میں جگہ بناؤں گا”، کپتان کوئٹہ گلیڈی ایٹرز کا عزم

لاہور/کوئٹہ: کوئٹہ گلیڈی ایٹرز کے کپتان سعود شکیل نے پی ایس ایل کے گیارہویں ایڈیشن کو اپنے کیریئر کے لیے انتہائی اہم قرار دیتے ہوئے کہا ہے کہ وہ اس سیزن میں بہترین پرفارمنس کے ذریعے پاکستان کی وائٹ بال ٹیم میں دوبارہ جگہ بنانے کے لیے پرامید ہیں۔ میڈیا سے گفتگو کرتے ہوئے انہوں نے گزشتہ سیزن کی یاد تازہ کی اور کہا کہ پچھلا سیزن ہمارے لیے بہترین رہا تھا، اگرچہ ہم آخری لمحے میں فائنل ہار گئے تھے، لیکن اس بار ہم ادھورا خواب پورا کرنے کی کوشش کریں گے۔

سعود شکیل نے ٹیم کے نئے بولنگ اٹیک پر اعتماد کا اظہار کرتے ہوئے کہا کہ ہمارے پاس باصلاحیت نئے فاسٹ بولرز آئے ہیں، جن کے ساتھ مل کر حریف ٹیموں کو ٹف ٹائم دیں گے۔ تماشائیوں کے بغیر میچز کھیلنے کے سوال پر ان کا کہنا تھا کہ “شائقین کے ہونے سے جذبہ ضرور بڑھتا ہے، لیکن گراؤنڈ میں ہمارا جوش وہی رہے گا۔” انہوں نے مداحوں سے اپیل کی کہ وہ اسٹیڈیم نہ آ سکنے کی صورت میں گھروں سے اپنی ٹیم کو بھرپور سپورٹ کریں۔

گفتگو کے دوران انہوں نے شاہین شاہ آفریدی اور حارث رؤف سے متعلق اپنے حالیہ بیان پر وضاحت دیتے ہوئے کہا کہ “پوڈکاسٹ میں شاہین اور حارث کے حوالے سے جو بات کی تھی وہ محض ایک مذاق تھا، لیکن اسے ضرورت سے زیادہ سنجیدہ لے لیا گیا۔” انہوں نے واضح کیا کہ کھلاڑیوں کے درمیان اس طرح کی ہنسی مذاق کی گفتگو کو منفی رنگ نہیں دینا چاہیے۔