ملک کے 3 بڑے کھاد ساز اداروں کیلئے گیس کی بہتر ترسیل کے معاہدوں پر دستخط

کراچی/اسلام آباد: پاکستان میں گیس کی پیداوار اور توانائی کے شعبے کے لیے خوشخبری سامنے آئی ہے۔ ماری انرجیز نے پاکستان اسٹاک ایکسچینج (PSX) کو باضابطہ طور پر مطلع کیا ہے کہ ملک کے تین بڑے کھاد ساز اداروں کے ساتھ گیس کی بہتر ترسیل کے اسٹریٹجک معاہدوں پر دستخط کر دیے گئے ہیں۔ ان معاہدوں کا بنیادی مقصد گیس پائپ لائن نیٹ ورک میں موجود رکاوٹوں کو دور کرنا اور کھاد کے کارخانوں کو گیس کی بلاتعطل فراہمی یقینی بنانا ہے۔

کمپنی کی جانب سے جاری کردہ خط کے مطابق، گیس کے دباؤ (Pressure) کو برقرار رکھنے اور اس میں بہتری لانے کے لیے مختلف اہم مقامات پر جدید ‘کمپریشن سسٹم’ نصب کیے جائیں گے۔ اس سسٹم کی تنصیب سے کھاد کے کارخانوں کو مقامی گیس کا مطلوبہ دباؤ مسلسل فراہم ہوتا رہے گا، جس سے پیداواری عمل میں تیزی آئے گی۔

مزید برآں، ملکی سطح پر یوریا کی پیداوار کو سہارا دینے اور زراعت کے شعبے کو مستحکم کرنے کے لیے ماری گیس فیلڈ سے ‘پریشر انہانسمنٹ فیسیلیٹی’ (PEF) پروگرام کا بھی آغاز کر دیا گیا ہے۔ ماہرین کے مطابق، ان اقدامات سے نہ صرف گیس کی پیداوار میں اضافہ ہوگا بلکہ ملک میں کھاد کے بحران پر قابو پانے اور زرعی خود کفالت حاصل کرنے میں بھی بڑی مدد ملے گی۔