ٹرمپ کے حملے مؤخر کرنے کے اعلان پر دنیا بھر کی سٹاک مارکیٹس میں تیزی

کراچی: امریکی صدر ڈونلڈ ٹرمپ کی جانب سے ایران پر حملے مؤخر کرنے اور مذاکرات کے آغاز کے اعلان نے پاکستان سمیت دنیا بھر کی اسٹاک مارکیٹس میں نئی جان ڈال دی ہے۔ عید کی چھٹیوں کے بعد کاروباری ہفتے کے پہلے ہی روز پاکستان اسٹاک ایکسچینج (PSX) میں زبردست تیزی دیکھی گئی، جس کے نتیجے میں ہنڈرڈ انڈیکس 1 لاکھ 57 ہزار پوائنٹس کی نفسیاتی حد عبور کر گیا۔

کاروبار کے دوران انڈیکس میں 4000 سے زائد پوائنٹس کا غیر معمولی اضافہ ریکارڈ کیا گیا، جس سے انڈیکس 1 لاکھ 57 ہزار 442 پوائنٹس کی بلند ترین سطح پر پہنچ گیا۔ واضح رہے کہ گزشتہ کاروباری ہفتے کے اختتام پر مارکیٹ 1 لاکھ 52 ہزار 740 پوائنٹس پر بند ہوئی تھی۔ سرمایہ کاروں کا ماننا ہے کہ مشرقِ وسطیٰ میں کشیدگی میں کمی کے امکانات نے مارکیٹ میں اعتماد کی لہر دوڑا دی ہے۔

دوسری جانب ایشیائی منڈیوں میں بھی تیزی کا رجحان غالب رہا۔ جاپان کے ‘نکئی انڈیکس’ میں 1.7 فیصد، جنوبی کوریا کے ‘کوسپی انڈیکس’ میں 4 فیصد، جبکہ ہانگ کانگ کے ‘ہانگ سنگ’ میں 1.5 فیصد کا بڑا اضافہ دیکھا گیا۔ چین کا ‘شنگھائی کمپوزٹ’ بھی ایک فیصد اضافے کے ساتھ بند ہوا۔ عالمی سطح پر سپلائی چین کی بحالی اور تیل کی قیمتوں میں کمی کے خدشات دور ہونے سے سرمایہ کار ایک بار پھر مارکیٹ میں سرگرم ہو گئے ہیں۔