ٹرمپ کے ایران پر حملے مؤخر کرنے کے اعلان کے بعد خام تیل کی قیمتیں گر گئیں

 امریکی صدر ڈونلڈ ٹرمپ کی جانب سے ایران کے بجلی گھروں اور توانائی کی تنصیبات پر مجوزہ فوجی حملے 5 روز کے لیے مؤخر کرنے کے اعلان کے بعد عالمی منڈی میں تیل کی قیمتوں میں بڑی کمی ریکارڈ کی گئی ہے۔ صدر ٹرمپ کے اس بیان نے مشرقِ وسطیٰ میں جنگ کے بادل چھٹنے کی امید پیدا کر دی ہے، جس کا فوری اثر پیٹرولیم مارکیٹ پر نظر آیا۔

عالمی منڈی میں امریکی کروڈ آئل (WTI) کی قیمت میں یکدم 10 فیصد کمی دیکھنے میں آئی، جس کے بعد یہ 88.34 ڈالر فی بیرل کی سطح پر آ گیا ہے۔ اسی طرح برطانوی خام تیل (Brent) کی قیمت بھی 10 فیصد کمی کے ساتھ 101.49 ڈالر فی بیرل پر آگئی ہے۔ ماہرینِ معیشت کا کہنا ہے کہ سپلائی چین میں ممکنہ تعطل کا خدشہ کم ہونے سے قیمتوں میں یہ نمایاں گراوٹ آئی ہے۔

ڈونلڈ ٹرمپ نے اپنے سوشل میڈیا پلیٹ فارم ‘ٹروتھ سوشل’ پر جاری ایک بیان میں انکشاف کیا کہ امریکہ اور ایران کے درمیان گزشتہ دو روز کے دوران مشرقِ وسطیٰ کے تنازع کے ‘مکمل اور جامع حل’ کے لیے نہایت مثبت اور تعمیری بات چیت ہوئی ہے۔ صدر ٹرمپ نے بتایا کہ مذاکرات کے اس خوشگوار لہجے کو مدنظر رکھتے ہوئے انہوں نے ‘محکمہ جنگ’ کو تمام فوجی حملے پانچ روز کے لیے روکنے کی ہدایت دی ہے، جو کہ جاری مذاکرات کی کامیابی سے مشروط ہے۔ یہ سفارتی پیش رفت ایک ایسے وقت میں سامنے آئی ہے جب خطہ ایک بڑی جنگ کے دہانے پر کھڑا تھا۔