کراچی: آبنائے ہرمز کی بندش، پاکستان کی آر ایل این جی کی 75 فیصد امپورٹ جمود کا شکار

کراچی: مشرقِ وسطیٰ کی حالیہ کشیدگی اور آبنائے ہرمز (Strait of Hormuz) کی بندش کے باعث پاکستان کی توانائی کی فراہمی کا نظام شدید متاثر ہوا ہے، جس کے نتیجے میں آر ایل این جی (RLNG) کی 75 فیصد درآمد جمود کا شکار ہو گئی ہے۔ ایک تازہ ریسرچ رپورٹ کے مطابق، مارچ 2026ء کے دوران پاکستان آنے والے آر ایل این جی کے 8 جہازوں کے شیڈول کے برعکس اب تک محض 2 جہاز ہی پہنچ سکے ہیں۔

درآمدی گیس کے اس بڑے بحران سے نمٹنے کے لیے پاکستان نے مقامی قدرتی گیس کی پیداوار میں بڑے پیمانے پر اضافہ کر دیا ہے۔ رپورٹ کے مطابق، یکم مارچ سے 23 مارچ 2026ء تک مقامی گیس کی اوسط پیداوار 361 ایم ایم سی ایف ڈی (MMCFD) تک پہنچ گئی ہے۔ اس اضافے کی بنیادی وجہ بجلی کے شعبے کی جانب سے گیس کی بڑھتی ہوئی طلب ہے، جو مارچ میں 76 فیصد سے بڑھ کر 94 فیصد کی بلند ترین سطح پر آ گئی ہے۔

مقامی پیداوار کو بڑھانے کے لیے ماڑی، اُچ، قادر پور، سوئی، ناشپا اور ٹل بلاک جیسے اہم گیس فیلڈز میں آپریشنز تیز کر دیے گئے ہیں۔ ماہرین کا کہنا ہے کہ درآمدی گیس کی فراہمی میں تعطل نے ملک کو مقامی وسائل پر انحصار بڑھانے پر مجبور کر دیا ہے، تاکہ بجلی کی پیداوار اور صنعتی پہیہ رواں رکھا جا سکے۔ تاہم، اگر بین الاقوامی سپلائی لائنز جلد بحال نہ ہوئیں تو توانائی کے شعبے پر دباؤ مزید بڑھ سکتا ہے۔