ہائی آکٹین پر پیٹرولیم لیوی میں 200 روپے فی لیٹر اضافہ، نئی قیمت نافذ

اسلام آباد: حکومت نے ہائی آکٹین ایندھن پر پیٹرولیم لیوی میں 200 روپے فی لیٹر اضافہ کر دیا ہے، جس کے بعد لیوی کی مجموعی شرح 305 روپے 37 پیسے فی لیٹر ہو گئی ہے۔ اس حوالے سے باقاعدہ نوٹیفکیشن جاری کر دیا گیا ہے۔

نوٹیفکیشن کے مطابق اس سے قبل ہائی آکٹین پر پیٹرولیم لیوی 105 روپے 37 پیسے فی لیٹر تھی۔ اضافے کے بعد ملک بھر میں ہائی آکٹین ایندھن کی نئی قیمت 535 روپے فی لیٹر مقرر کر دی گئی ہے، جس کا اطلاق فوری طور پر ہوگا۔

دوسری جانب وزیراعظم شہباز شریف کا کہنا ہے کہ عام صارفین کو ریلیف دینے کے لیے نچلے اور درمیانے طبقے کی گاڑیوں میں استعمال ہونے والے ایندھن کی قیمتوں میں اضافہ نہیں کیا گیا۔ انہوں نے واضح کیا کہ قیمت میں اضافہ صرف لگژری گاڑیوں میں استعمال ہونے والے ہائی آکٹین فیول تک محدود رکھا گیا ہے۔