پی ایس ایل ٹیموں کے لیے بڑی خوشخبری: 6 بنگلہ دیشی اسٹارز کو این او سی جاری

ڈھاکہ/لاہور: پاکستان سپر لیگ (PSL) کی فرنچائزز کے لیے ایک بڑا ریلیف سامنے آیا ہے کیونکہ بنگلہ دیش کرکٹ بورڈ نے اپنے 6 اہم کھلاڑیوں کو لیگ میں شرکت کے لیے جزوی طور پر این او سی (NOC) جاری کر دیا ہے۔ بنگلہ دیشی میڈیا کے مطابق، نیوزی لینڈ کے خلاف ہوم سیریز کی مصروفیات کے باعث کھلاڑیوں کو مکمل طور پر نہیں بلکہ مخصوص دورانیے کے لیے اجازت دی گئی ہے۔

تفصیلات کے مطابق، 4 بنگلہ دیشی کھلاڑیوں کو 12 اپریل تک این او سی جاری کیا گیا ہے، جبکہ پرویز حسین کو 21 اپریل تک پاکستان میں رہنے کی اجازت ملی ہے۔ اسٹار فاسٹ باؤلر مستفیض الرحمان کو دو مرحلوں میں این او سی دیا گیا ہے؛ وہ پہلے 26 مارچ سے 12 اپریل تک پی ایس ایل کا حصہ ہوں گے، جس کے بعد وہ دوبارہ 24 اپریل سے 3 مئی تک اپنی ٹیم کو دستیاب ہوں گے۔

بنگلہ دیشی میڈیا کا کہنا ہے کہ نیوزی لینڈ کے خلاف ٹی ٹوئنٹی سیریز کے دوران بھی چند کھلاڑی پی ایس ایل کے اہم میچز کے لیے دستیاب رہیں گے، جس سے پلے آف مرحلے میں ٹیموں کو مضبوط کمبی نیشن بنانے میں مدد ملے گی۔