پی ایس ایل11کے آن لائن ٹکٹس کی فروخت کاآغازمنگل سے ہوگا

پی ایس ایل سیزن الیون کے لیے آن لائن ٹکٹوں کی فروخت کا آغازمنگل سے ہو گا۔پہلے مرحلے میں ٹکٹس دوپہر 12 بجے سے آن لائن فروخت کے لیے دستیاب ہوں گی، شائقین کرکٹ آن لائن ویب سائٹ کے ذریعے ٹکٹ خرید سکیں گے، فزیکل ٹکٹ 24 مارچ سے ایکسپریس سینٹرز پر دستیاب ہوں گے۔

پی ایس ایل 11 میں پہلی بار 8 ٹیمیں شرکت کریں گی، ایونٹ میں مجموعی طور پر 44 میچز کھیلے جائیں گے، لاہور، کراچی، راولپنڈی، ملتان، فیصل آباد اور پشاور میں میچز کھیلے جائیں گے۔

دوسری جانب فیصل آباد اور پشاور میں پہلی بار  پی ایس ایل کے میچز ہوں گے۔لاہور اور کراچی میں جنرل ٹکٹ انکلیوژر کی کم سے کم قیمت 250 روپے رکھی گئی ہے، فیصل آباد میں جنرل انکلیوژر کی قیمت 300 روپے سے شروع ہو گی۔

ملتان اور راولپنڈی میں جنرل ٹکٹ انکلیوژر کی ٹکٹ 400 روپے رکھی گئی ہے۔ ایک شناختی کارڈ پر زیادہ سے زیادہ 8 ٹکٹ خریدے جا سکیں گے۔کراچی، لاہور اور راولپنڈی میں محدود تعداد میں ای ٹکٹ کی سہولت دستیاب ہوگی۔

پشاور کے عمران خان اسٹیڈیم میں 28 مارچ کو پشاور زلمی اور راولپنڈی پنڈیز کے میچ میں فیملی انکلوژر مختص کیے گئے ہیں ۔ وی آئی پی  فیملی زون کے ٹکٹ 2000 روپے میں دستیاب ہونگے۔کراچی، لاہور اور راولپنڈی میں کارپوریٹ باکس دستیاب ہوں گے جبکہ تمام اسٹیڈیمز میں مختلف گیلری کے ٹکٹس بھی دستیاب ہوں گے۔