تیسرا ون ڈے: پاکستان کی امپائر کے فیصلے پر میچ ریفری سے شکایت

پاکستان کرکٹ ٹیم نے بنگلادیش کے خلاف تیسرے ون ڈے میں امپائر کے ایک متنازع فیصلے پر میچ ریفری نعیم راشد سے باضابطہ احتجاج کیا ہے۔ ٹیم مینجمنٹ کا اعتراض ہے کہ آن فیلڈ امپائر کمار دھرماسینا نے بنگلادیش کو اس وقت ایل بی ڈبلیو ریویو لینے کی اجازت دی جب گیند کا ری پلے اسٹیڈیم کی بڑی اسکرین پر چل چکا تھا۔ یہ واقعہ میچ کے آخری اوور میں پیش آیا جب پاکستان کو دو گیندوں پر 12 رنز درکار تھے۔ وائیڈ بال کے فیصلے کے خلاف ریویو کے نتیجے میں نہ صرف اضافی رن ضائع ہوا بلکہ اگلی گیند پر شاہین آفریدی کے آؤٹ ہونے سے پاکستان میچ اور سیریز 1-2 سے ہار گیا۔

قوانین کے مطابق، کھلاڑیوں کو ری پلے دیکھنے سے قبل ریویو کا فیصلہ کرنا ہوتا ہے، تاہم پاکستانی موقف کے مطابق یہاں ضابطے کی خلاف ورزی ہوئی۔ واضح رہے کہ یہ سیریز کا مسلسل دوسرا میچ ہے جس میں پاکستان نے امپائرنگ پر تحفظات کا اظہار کیا ہے۔ اس سے قبل سلمان علی آغا پر بھی ایک فیصلے پر احتجاج کرنے پر جرمانہ عائد کیا جا چکا ہے۔ پی سی بی اب اس معاملے پر آئی سی سی کے ردعمل کا منتظر ہے