پاکستانی کھلاڑیوں کا سرفراز احمد کو خراجِ تحسین

پاکستان کرکٹ ٹیم کے سابق اور موجودہ کھلاڑیوں نے چیمپئنز ٹرافی 2017 کے فاتح کپتان سرفراز احمدکو ریٹائرمنٹ کے اعلان کے بعد خراجِ تحسین پیش کیا ہے۔

سماجی رابطے کی ویب سائٹ ایکس پر سرفراز احمد کی ریٹائرمنٹ کے اعلان کے بعد اپنے پیغام میں سٹار بیٹربابر اعظم نے کہا، “سيفی بھائی، آپ کی قیادت میں کھیلنا واقعی ایک اعزاز تھا۔ آپ کی رہنمائی اور یقین کے ساتھ ساتھ پاکستان کرکٹ کو دیے گئے یادگار لمحات کے لیے شکریہ۔ آپ کی نئی زندگی کے اس مرحلے کے لیے کامیابی اور سکون کی دعا کرتا ہوں۔”

فخر زمان نے بھی ایکس پر ٹوئٹ کرتے ہوئے کہا، “ایک عظیم انسان، لیڈر اور کو ریٹائرمینٹ مبارک، بہترین کیریر پر آپ کو مبارک ہو، آپ کی خدمات کے لیے دل سے شکریہ۔”

شان مسعود نے سرفراز احمد کو شاندر کیریر پر خراجِ تحسین پیش کرتے ہوئے لکھا، “آپ کرکٹ کے لیے رول ماڈل ہیں، کھلاڑیوں پر اعتماد، جدوجہد اور یادگار لمحات کے لیے سابق کپتان کا شکریہ۔”

سابق فاسٹ بالر اور چیف سیلیکٹروہاب ریاض نے بھی سوشل میڈیا پلیٹ فارم ایکس میں سرفراز احمد کو کامیاب کیریر پر مبارک باد دیتے ہوئے مستقبل کے لیے نیک تمناؤں کا اظہار کیا۔

سابق کپتان  اظہر علی نے کہا، “آپ کے ساتھ کھیلنا ہمیشہ یاد رہے گا، پاکستان کرکٹ ٹیم کے لیے آپ کا جذبہ، قیادت اور عزم ہمیشہ یاد رکھا جائے گا۔”

اس کے علاوہ دیگر کھلاڑیوں نے بھی سابق کپتان کے لیے نیک تمناؤں کا اظہار کیا اور ان کے کامیاب کیریر پر مبارک باد پیش کی۔

واضح رہے کہ سرفراز احمد نے گزشتہ روز انٹرنیشنل کرکٹ سے ریٹائرمنٹ کا اعلان کیا تھا۔