مشرقی وسطیٰ میں جنگ کے سائے سٹاک مارکیٹس پر برقرار، منفی زون میں آغاز

مشرقی وسطیٰ میں جاری کشیدگی کے سبب پاکستان سٹاک ایکسچینج میں منفی رجحان برقرار ہے اور ایشیائی سٹاک مارکیٹس بھی شدید مندی کا شکار ہیں۔

کاروباری ہفتے کے پہلے روز کاروبار کے آغاز پر سٹاک مارکیٹ میں نمایاں کمی دیکھنے میں آئی، اور ایک ہزار سے زائد پوائنٹس کی کمی کے بعد پاکستان سٹاک ایکسچینج کا ہنڈرڈ انڈیکس ایک لاکھ 52 ہزار 593 پوائنٹس کی سطح پر پہنچ گیا۔

گذشتہ کاروباری دن کے اختتام پر ہنڈرڈ انڈیکس 555 پوائنٹس کی کمی کے ساتھ ایک لاکھ 53 ہزار 866 پوائنٹس کی سطح پر بند ہوا تھا۔

عالمی منظر نامے پر مشرق وسطیٰ میں جنگ کے باعث ایشیائی سٹاک مارکیٹس میں بھی مندی دیکھی گئی۔ خبرایجنسی کے مطابق جاپان کے نکی انڈیکس میں ایک فیصد سے زائد کمی ریکارڈ کی گئی، چین کا شنگھائی کمپوزٹ انڈیکس بھی ایک فیصد گراوٹ کا شکار ہے، جبکہ ملائیشیا کے فٹسی برسا انڈیکس میں بھی ایک فیصد مندی دیکھی گئی۔

دوسری جانب ہانگ کانگ کے ہانگ سینگ انڈیکس میں معمولی تیزی ریکارڈ کی گئی ہے۔