پاکستان میں لگژری اشیاء کی درآمدات میں اضافہ، 8 ماہ میں مجموعی درآمدات 45 ارب ڈالر سے تجاوز

پاکستان میں غیر ملکی لگژری اشیاء سمیت مختلف مصنوعات کی درآمدات میں نمایاں اضافہ ریکارڈ کیا گیا ہے اور رواں مالی سال کے پہلے آٹھ ماہ کے دوران مجموعی درآمدات 45 ارب ڈالر سے تجاوز کر گئی ہیں۔

دستاویزات کے مطابق جولائی تا فروری کے دوران مجموعی درآمدات میں 8.21 فیصد اضافہ ریکارڈ کیا گیا ہے۔ یہ اعداد و شمار Pakistan Bureau of Statistics کی جانب سے جاری کیے گئے ہیں۔

رپورٹ کے مطابق موبائل فونز کی درآمدات میں 30 فیصد اضافہ دیکھنے میں آیا جس کے بعد ان کی مالیت 1.29 ارب ڈالر تک پہنچ گئی۔ اسی طرح مہنگی گاڑیوں کی درآمدات میں 126 فیصد کا غیر معمولی اضافہ ریکارڈ کیا گیا۔

گاڑیوں سمیت ٹرانسپورٹ کے شعبے سے متعلق درآمدات مجموعی طور پر 2.58 ارب ڈالر تک ریکارڈ کی گئیں۔

کھانے پینے کی اشیاء کی درآمدات 6.41 ارب ڈالر تک پہنچ گئیں جبکہ زرعی و غذائی مصنوعات کی درآمدات میں 18 فیصد اضافہ ہوا۔ دستاویز کے مطابق چینی، چائے، پام آئل اور سویا بین کی درآمدات میں بھی نمایاں اضافہ دیکھا گیا۔

اسی طرح مشینری کی درآمدات 11.7 فیصد اضافے کے ساتھ 6.98 ارب ڈالر تک پہنچ گئیں جبکہ دھاتوں کی درآمدات میں 17 فیصد اضافہ ریکارڈ کیا گیا۔

دوسری جانب پیٹرولیم مصنوعات کی درآمدات میں معمولی کمی دیکھنے میں آئی جبکہ ٹیکسٹائل سے متعلق درآمدات 7 فیصد کمی کے بعد 4.44 ارب ڈالر ریکارڈ کی گئیں۔