پاکستان اسٹاک ایکسچینج میں زبردست تیزی، 100 انڈیکس میں 9697 پوائنٹس کا بڑا اضافہ

کراچی: پاکستان اسٹاک ایکسچینج میں کاروباری ہفتے کے اختتام پر زبردست تیزی دیکھنے میں آئی اور مارکیٹ پوائنٹس کے لحاظ سے دوسری بڑی تیزی کے ساتھ بند ہوئی۔

امریکی صدر کی جانب سے مشرقِ وسطیٰ میں ممکنہ جنگ بندی کی پیشگوئی، خام تیل کی گرتی قیمتیں اور توقعات کے برعکس مانیٹری پالیسی فیصلوں نے مارکیٹ میں سرمایہ کاروں کے اعتماد کو بڑھایا۔

کاروبار کے اختتام پر کے ایس ای 100 انڈیکس میں 9 ہزار 697 پوائنٹس یعنی 6.62 فیصد اضافہ ریکارڈ کیا گیا، جس کے بعد انڈیکس 1 لاکھ 56 ہزار 177 پوائنٹس کی سطح پر بند ہوا۔

دن بھر کے کاروبار کے دوران انڈیکس میں 10 نفسیاتی حدیں بحال ہوئیں جبکہ ٹریڈنگ کے دوران مجموعی طور پر 12 نفسیاتی سطحیں بحال کی گئیں۔ اس دوران انڈیکس 3 ہزار 60 پوائنٹس کے بینڈ میں ٹریڈ کرتا رہا۔

مارکیٹ میں کے ایس ای 100 انڈیکس کی بلند ترین سطح 1 لاکھ 58 ہزار 354 پوائنٹس جبکہ کم ترین سطح 1 لاکھ 55 ہزار 294 پوائنٹس ریکارڈ کی گئی۔

کاروباری سرگرمی کے دوران 31 ارب 22 کروڑ روپے مالیت کے 48 کروڑ 65 لاکھ شیئرز کے سودے طے پائے۔ مجموعی طور پر 567 کمپنیوں کے حصص کا کاروبار ہوا، جن میں سے 388 کمپنیوں کے شیئرز کی قیمتوں میں اضافہ جبکہ 43 کمپنیوں کے حصص کی قیمتوں میں کمی ریکارڈ کی گئی۔