عالمی و مقامی سطح پر سونا سستا اور چاندی مہنگی

عالمی اور مقامی صرافہ بازاروں میں سونے کی قیمتوں میں نمایاں کمی ریکارڈ کی گئی ہے، جبکہ اس کے برعکس چاندی کی قیمتوں میں اضافہ دیکھا گیا ہے۔ بین الاقوامی بلین مارکیٹ میں فی اونس سونا 34 ڈالر کی کمی کے بعد 5 ہزار 110 ڈالر کی سطح پر آگیا، جس کے براہِ راست اثرات مقامی مارکیٹ پر بھی مرتب ہوئے۔ پاکستان میں فی تولہ سونے کی قیمت 3 ہزار 400 روپے کمی کے بعد 5 لاکھ 33 ہزار 762 روپے کی سطح پر آ گئی ہے، جبکہ 10 گرام سونے کی قیمت 2 ہزار 915 روپے گھٹ کر 4 لاکھ 57 ہزار 614 روپے ہوگئی ہے۔ صرافہ ڈیلرز ایسوسی ایشن کے مطابق، گزشتہ چار دنوں میں سونے کی قیمت میں مجموعی طور پر 30 ہزار 100 روپے کی بڑی کمی واقع ہوئی ہے۔ دوسری جانب چاندی کی قیمت 104 روپے اضافے سے 8 ہزار 914 روپے فی تولہ تک پہنچ گئی ہے۔