قومی ٹیم کی ناقص کارکردگی پر سابق کرکٹرز برس پڑے

مینز ٹی 20 ورلڈ کپ 2026ء کے سپر ایٹ مرحلے میں انگلینڈ کے ہاتھوں شکست کے بعد پاکستانی ٹیم کی کارکردگی پر سابق کرکٹرز اور ماہرین کی جانب سے کڑی تنقید کا سلسلہ شروع ہو گیا ہے۔ سابق کپتان محمد حفیظ نے ٹیم کی ناکامی کو محض ایک میچ کا نتیجہ قرار دینے کے بجائے پورے ٹورنامنٹ کی ناقص حکمتِ عملی کا شاخسانہ قرار دیا ہے۔ دوسری جانب شعیب ملک نے سخت الفاظ میں تبصرہ کرتے ہوئے کہا کہ بنیادی مہارت اور نظم و ضبط کے بغیر جدید کرکٹ کے دعوے ایسے ہی ہیں جیسے نرسری پڑھے بغیر دسویں کا امتحان دینا۔

سابق ٹیسٹ کرکٹر محمد یوسف اور بھارتی باؤلر مناف پٹیل نے انگلش کپتان ہیری بروک کی قیادت اور اننگز کو سراہتے ہوئے پاکستان کی کمزور فیلڈنگ اور باؤلنگ اٹیک کی خامیوں کو شکست کی بڑی وجہ قرار دیا۔ احمد شہزاد نے انفرادی کارکردگی پر سوال اٹھاتے ہوئے بابر اعظم کی سست رفتار اننگز، شاداب خان کی مہنگی باؤلنگ اور صائم ایوب کی ناکامی کو تنقید کا نشانہ بنایا، جبکہ ابرار احمد کو ٹیم میں شامل نہ کرنے پر بھی حیرت کا اظہار کیا۔ سابق انگلش کپتان مائیکل وان نے موسمی حالات کے پیش نظر برصغیر کی ٹیموں کے سیمی فائنل تک پہنچنے پر بھی شک کا اظہار کیا ہے۔ اس شکست کے بعد پاکستان کی سیمی فائنل تک رسائی کی راہیں انتہائی کٹھن ہو گئی ہیں۔