ماڈل ماہ نور نے سینیر پروڈیوسر عمر مختار کو بے نقاب کر دیا

کراچی: پاکستانی شوبز انڈسٹری کی معروف شخصیات کے قریبی دوست اور نجی ٹی وی کے پروڈیوسر عمر مختار شدید تنقید کی زد میں آگئے ہیں۔ ماڈل ماہ نور رحیم نے سوشل میڈیا پر ایک تہلکہ خیز ویڈیو شیئر کرتے ہوئے عمر مختار پر مبینہ طور پر خواتین کے ساتھ آن لائن نامناسب رویہ اختیار کرنے اور شادی شدہ ہونے کے باوجود خود کو ‘سنگل’ ظاہر کر کے رابطے کرنے کا الزام عائد کیا ہے۔

ماہ نور رحیم نے اپنا ذاتی تجربہ شیئر کرتے ہوئے بتایا کہ 2023 میں کینیڈا قیام کے دوران مذکورہ پروڈیوسر نے انہیں رات گئے پیغامات بھیجے، جن کا مقصد پیشہ ورانہ کام کے بجائے محض گپ شپ تھا۔ ماڈل کے مطابق، انہوں نے ان پیغامات کے اسکرین شاٹس عمر مختار کی اہلیہ کو بھی بھیجے جس پر انہیں شکریہ کا جواب موصول ہوا۔

اس انکشاف کے بعد معروف فوٹوگرافر مہا وجاہت (مہاز) سمیت کئی دیگر خواتین نے بھی کمنٹس میں اپنے تلخ تجربات کا ذکر کیا۔ مہا وجاہت نے لکھا کہ “کاش مجھ میں بھی اتنی ہمت ہوتی کہ میں اپنا بدترین تجربہ شیئر کر سکتی۔” سوشل میڈیا صارفین کی جانب سے اداکارہ ہانیہ عامر کو بھی تنقید کا نشانہ بنایا جا رہا ہے، جو عمر مختار کی بہترین دوست سمجھی جاتی ہیں اور اکثر ان کے ساتھ ویڈیوز میں نظر آتی ہیں۔ ماہ نور رحیم کا کہنا ہے کہ پہلی ویڈیو کے بعد انہیں بے شمار لڑکیوں کے پیغامات موصول ہوئے جنہوں نے اسی طرح کی کہانیاں سنائی ہیں، جس سے اس معاملے کی سنگینی میں اضافہ ہو گیا ہے۔