پشاور ہائیکورٹ کا ڈپٹی سپیکر کی گرفتاری روکنے، گھر ڈی سیل کرنے کا حکم

پشاور ہائیکورٹ نے خیبر پختونخوا اسمبلی کی ڈپٹی اسپیکر ثریا بی بی کو تھری ایم پی او (3 MPO) کے تحت گرفتار کرنے سے روکتے ہوئے ان کی سرکاری رہائش گاہ کو فوری طور پر ڈی سیل کرنے کا حکم دے دیا ہے۔

ڈپٹی اسپیکر ثریا بی بی کے گھر پر پولیس کے چھاپے اور اسے سیل کیے جانے کے خلاف دائر درخواست پر سماعت پشاور ہائیکورٹ کے جسٹس اعجاز انور اور جسٹس محمد فہیم ولی پر مشتمل دو رکنی بینچ نے کی۔ دورانِ سماعت درخواست گزار کے وکیل نے موقف اختیار کیا کہ ثریا بی بی کو 2024ء میں قانونی طور پر سرکاری رہائش گاہ الاٹ کی گئی تھی، تاہم صوبے میں 11 اکتوبر کو ایمرجنسی اور گورنر راج کے نفاذ کے بعد 14 اکتوبر کو ان کے گھر پر غیر قانونی چھاپہ مار کر اسے سیل کر دیا گیا۔

وکیل نے دلائل دیے کہ آئینی اور قانونی طور پر گورنر راج کے دوران بھی اسپیکر یا ڈپٹی اسپیکر کی رہائش گاہ کو سیل نہیں کیا جا سکتا۔ پشاور ہائیکورٹ نے انتظامیہ کی جانب سے گھر سیل کرنے کا نوٹیفکیشن معطل کرتے ہوئے گھر ڈی سیل کرنے کا حکم جاری کیا اور پولیس کو تھری ایم پی او کے تحت ان کی گرفتاری سے روک دیا۔ عدالت نے کیس کی مزید سماعت ملتوی کرتے ہوئے چیف سیکرٹری، آئی جی پولیس اور دیگر فریقین سے آئندہ سماعت پر تفصیلی جواب طلب کر لیا ہے