جنگ کے خاتمے کیلئے امن معاہدے کو قبول کرنے کیلئے تیار ہیں:زیلنسکی

یوکرین کے صدر ولادیمیر زیلنسکی نے جاری جنگ کے خاتمے کے لیے ایک اہم سفارتی لچک کا مظاہرہ کرتے ہوئے کہا ہے کہ وہ ایسے امن معاہدے کو قبول کرنے کے لیے تیار ہیں جس کے تحت موجودہ علاقائی صورت حال (Frontline Freeze) کو برقرار رکھا جائے۔

امریکی خبر رساں ادارے ‘فاکس نیوز’ کو دیے گئے ایک انٹرویو کے دوران یوکرینی صدر سے سوال پوچھا گیا کہ کیا وہ ایسے کسی ممکنہ امن معاہدے پر رضامند ہوں گے جس کے تحت فرنٹ لائن کو منجمد کر دیا جائے اور یوکرین کے پاس اپنے ملک کا 75 فیصد یا اس سے زیادہ حصہ باقی رہے۔ اس پر جواب دیتے ہوئے ولادیمیر زیلنسکی نے کہا کہ “ہاں، اس وقت موجودہ صورت حال کو منجمد کرنا ہوگا اور میرے خیال میں جنگ کو فوری طور پر ختم کرنے کا یہی ایک عملی اور حقیقی راستہ ہے”۔

واضح رہے کہ روس اور یوکرین کے درمیان عرصے سے جاری تنازع کے خاتمے کے لیے بین الاقوامی سطح پر سفارتی کوششیں تیز ہو چکی ہیں، تاہم علاقائی کنٹرول اور سرحدوں کی حتمی حیثیت سے متعلق تحفظات امن معاہدے کی راہ میں بنیادی رکاوٹ بنے ہوئے ہیں۔