حوثیوں کی مدینہ منورہ کی جانب ڈرون بھیجنے اور سعودی عرب پر حملے کی تردید

یمن کے حوثی گروپ نے سعودی عرب کے شہر مدینہ منورہ کی جانب ڈرون بھیجنے اور سعودی سرزمین پر کسی بھی قسم کی تازہ فوجی کارروائی کی سختی سے تردید کر دی ہے۔

خبر رساں ادارے ‘رائٹرز’ کے مطابق حوثی عسکری ترجمان یحییٰ سریع نے ایک بیان میں واضح کیا کہ ان کی تنظیم نے مدینہ منورہ کی طرف کوئی ڈرون روانہ کیا ہے اور نہ ہی سعودی عرب کی حدود میں کوئی عسکری آپریشن کیا ہے۔ حوثیوں کا یہ بیان سعودی عرب کی قیادت میں قائم عرب اتحاد کے اس دعوے کے بعد سامنے آیا ہے، جس میں عرب اتحاد نے فضائی دفاعی نظام (Air Defence System) کے ذریعے مدینہ منورہ اور سعودی عرب کے مشرقی علاقے میں 5 حمل آور ڈرونز کو فضا ہی میں تباہ کرنے کا دعویٰ کیا تھا۔

حوثی گروپ کی جانب سے اس واقعے سے مکمل لاتعلقی کے بعد دونوں اطراف کے بیانات میں شدید تضاد برقرار ہے۔ آزاد ذرائع سے تاحال تباہ کیے جانے والے ڈرونز کی اصلیت اور ان کی لانچنگ سائٹ کے حوالے سے کوئی تصدیق نہیں ہو سکی ہے۔