پاکستان کو آئی ایف این ڈیلز آف دی ایئر ایوارڈز 2025 میں دو عالمی اعزازات حاصل

اسلامی فنانسنگ معاہدے کو “پاکستان ڈیل آف دی ایئر 2025” قرار دیا گیا جبکہ پاکستان کو “سنڈیکیٹڈ فنانس ڈیل آف دی ایئر 2025” کا عالمی اعزاز بھی مل گیا۔

وزیر خزانہ محمد اورنگزیب نے اس کامیابی کو عالمی اعتماد کا مظہر قرار دیتے ہوئے کہا کہ یہ اعزاز پاکستان کی مضبوط معاشی حکمت عملی کے اعتراف کے مترادف ہے۔وزارت خزانہ کے اعلامیے کے مطابق یہ کامیاب معاہدہ عالمی اسلامی مالیاتی مارکیٹ میں پاکستان کی ساکھ کا واضح ثبوت ہے۔ ایک ارب ڈالر کی فنانسنگ میں ایشین ترقیاتی بینک نے کلیدی کردار ادا کیا۔وزارت خزانہ کا کہنا ہے کہ اس اعزاز سے پاکستان میں سرمایہ کاروں کا اعتماد مزید مستحکم ہونے کی توقع ہے اور یہ کامیابی اسلامی مالیاتی شعبے میں پاکستان کی بڑھتی ہوئی عالمی اہمیت کو ظاہر کرتی ہے۔اعلامیے کے مطابق ایوارڈز کی ایک تقریب 13 اپریل کو پلازو ورسائے میں منعقد ہوگی جبکہ دوسری تقریب 22 اپریل کو ای کیو کوالالمپور میں ہوگی۔وزارت خزانہ نے اس کامیابی پر شراکت دار بینکوں اور متعلقہ اداروں کو مبارکباد بھی پیش کی ہے۔