ٹی 20 ورلڈکپ: افغانستان کا جنوبی افریقہ کیخلاف ٹاس جیت کر باؤلنگ کا فیصلہ

ٹی 20 ورلڈکپ کے 13 ویں میچ میں افغانستان کے خلاف جنوبی افریقہ کی بیٹنگ جاری ہے۔ میچ بھارت کے شہر احمد آباد کے نریندر مودی سٹیڈیم میں کھیلا جا رہا ہے۔

افغانستان نے ٹاس جیت کر جنوبی افریقہ کو پہلے بیٹنگ کی دعوت دی۔ ٹاس کے بعد گفتگو کرتے ہوئے افغان کپتان راشد خان نے کہا کہ جیت کے لیے مشترکہ محنت ضروری ہے، پاور پلے میں بیٹنگ اور مڈل اوورز میں باؤلنگ کو بہتر کرنے کی ضرورت ہے۔

راشد خان نے بتایا کہ افغان ٹیم میں ایک تبدیلی کی گئی ہے، ضیاءالرحمان کی جگہ نور احمد کو پلیئنگ الیون میں شامل کیا گیا ہے۔

جنوبی افریقہ کے کپتان مارکرام نے کہا کہ وہ بھی ٹاس جیت کر پہلے باؤلنگ کرنا چاہتے تھے، تاہم کوشش ہوگی کہ اچھے رنز بنائیں۔ جنوبی افریقہ نے بھی ایک تبدیلی کی ہے، کوربن بوش کی جگہ جارج لنڈے کو پلیئنگ الیون میں شامل کیا گیا ہے۔