سونے کی قیمت میں آج پھر بڑا اضافہ، قیمتیں تاریخ کی نئی بلندیوں پر پہنچ گئیں

کراچی: عالمی اور مقامی مارکیٹوں میں سونے اور چاندی کی قیمتیں تاریخ کی نئی بلند ترین سطح پر پہنچ گئی ہیں، جس سے زیورات اور سرمایہ کاری کی مارکیٹ میں ہلچل مچ گئی ہے۔

بین الاقوامی بلین مارکیٹ میں فی اونس سونے کی قیمت میں یکدم 91 ڈالر کا بڑا اضافہ ریکارڈ کیا گیا، جس کے بعد سونے کی قیمت 4 ہزار 923 ڈالر کی نئی بلند ترین سطح پر پہنچ گئی۔

عالمی مارکیٹ میں اضافے کے اثرات مقامی سطح پر بھی دیکھے گئے، جہاں ملک میں فی تولہ سونے کی قیمت 9 ہزار 100 روپے اضافے کے بعد 5 لاکھ 14 ہزار 662 روپے کی تاریخی سطح پر پہنچ گئی۔

اسی طرح فی دس گرام سونے کی قیمت 7 ہزار 802 روپے بڑھ کر 4 لاکھ 41 ہزار 239 روپے ہو گئی۔

چاندی کی قیمتوں میں بھی نمایاں اضافہ دیکھا گیا، جہاں فی تولہ چاندی 372 روپے اضافے کے بعد 10 ہزار 275 روپے کی نئی بلند ترین سطح پر پہنچ گئی، جبکہ فی دس گرام چاندی کی قیمت 319 روپے اضافے سے 8 ہزار 809 روپے ہو گئی۔

ماہرین کے مطابق عالمی معاشی غیر یقینی صورتحال اور سرمایہ کاروں کا محفوظ سرمایہ کاری کی جانب رجحان قیمتی دھاتوں کی قیمتوں میں اضافے کی بڑی وجہ ہے۔