پاکستان عالمی شراکت داریوں کے نئے دور میں داخل، زرعی تعاون میں اہم پیش رفت

اسلام آباد: ایس آئی ایف سی کی فعال سفارتی اور معاشی حکمتِ عملی کے تحت پاکستان عالمی سٹریٹجک شراکت داریوں کے نئے دور میں داخل ہو گیا ہے۔ زرعی شعبہ میں اہم کامیابیوں کے ساتھ پاکستان نے چین اور انڈونیشیا کے ساتھ اقتصادی تعاون کے شعبے میں اہم پیش رفت کی ہے۔

پاکستان اور چین کے درمیان 79 کمپنیوں کے ساتھ 4.5 ارب ڈالر کی سرمایہ کاری کے لیے مفاہمتی یادداشتوں پر دستخط ہوئے۔ پاک-چین زرعی سرمایہ کاری کے معاہدے 10 کلیدی شعبوں پر محیط ہیں جن میں فوڈ پروسیسنگ، ایگری ٹیکنالوجی، لائیو سٹاک اور دیگر شعبے شامل ہیں۔

اسی دوران وزیرِ تجارت جام کمال خان اور انڈونیشیا کے سفیر چاندرا وارسنانتو سوکوٹجون کے درمیان ملاقات ہوئی جس میں پاکستان اور انڈونیشیا کے مابین چاول کی تجارت اور زرعی شعبہ میں تعاون کو مزید فروغ دینے پر اتفاق کیا گیا۔

وزیرِ تجارت نے کہا کہ پاکستان دنیا کے صفِ اول کے چاول برآمد کنندگان میں شامل ہے اور اس کے تجارتی اور اقتصادی تعلقات بین الاقوامی مارکیٹ میں پاکستان کی ساکھ اور برآمدات میں اضافہ کریں گے۔