ہاں کہیں گے تو شکرگزاررہوں گا ورنہ یادرکھوں گا، ٹرمپ کا گرین لینڈ کے معاملےپریورپ کو پیغام

ڈیووس میں ورلڈ اکنامک فورم سے خطاب کرتے ہوئے امریکی صدر ڈونلڈ ٹرمپ کا کہنا تھا کہ مجھے یورپ سے محبت ہے، میں اسے ترقی کرتے دیکھنا چاہتا ہوں لیکن یہ صحیح سمت میں نہیں جا رہا۔ ٹرمپ نے یہ بھی کہا کہ امریکہ یورپ اور نیٹو کی مدد کرے گا اور اس کے بدلے میں وہ صرف ’برف کا ایک ٹکڑا‘ چاہتے ہیں۔

صدر ڈونلڈ ٹرمپ نے گرین لینڈ کے حصول کی بات کرتے ہوئے یورپی رہنماؤں کو کہاہے کہ آپ ہاں کہہ سکتے ہیں جس پر ہم بہت شکر گزار ہوں گے، یا آپ نہ کہہ سکتے ہیں لیکن ہم اسے یاد رکھیں گے۔

ٹرمپ کا کہنا تھاکہ امریکی صدور تقریباً دو صدیوں سے گرین لینڈ خریدنے کی کوشش کرتے رہے ہیں۔ ڈنمارک گرین لینڈ پر اتنا خرچ نہیں کر رہا جتنا اس نے وعدہ کیا تھا۔یہ صرف امریکا ہے جو اس بڑے برفانی ٹکڑے کو محفوظ بنا سکتا ہے، اسے ترقی دے سکتا ہے اور بہتر بنا سکتا ہے۔

ٹرمپ نے مزید کہا کہ ایک مضبوط اور محفوظ امریکاکا مطلب ہے ایک مضبوط نیٹو۔امریکا نیٹو کے ساتھ سو فیصد کھڑا ہوگا، لیکن یہ یقین نہیں کہ اتحادی بھی بدلے میں یہی کریں گے۔

انھوں نے یوکرین کی جنگ پر بات کرتے ہوئے کہا کہ نیٹو کو یہ جنگ ختم کرنای ہوگی کیونکہ بہت سے لوگ بلا وجہ مر رہے ہیں۔ ان کا کہنا تھا کہ پوتن اور زیلنسکی دونوں معاہدہ کرنا چاہتے ہیں۔

ڈونلڈٹرمپ کاکہناتھاکہ امریکا نے تاریخ میں اتنی معاشی ترقی نہیں دیکھی جتنی اب ہو رہی ہے، امریکا پوری دنیا کا معاشی انجن ہے، ہم وینز ویلا کی مدد کر رہے ہیں، اب وہ بہت شاندار جا رہا ہے، مستقبل میں زیادہ کمائی کرے گا کیونکہ ہر بڑی آئل کمپنی امریکا کے ساتھ وہاں جارہی ہے۔