امریکہ میں اڑھائی من سونے کے کموڈ کی نیلامی

برطانوی خبر رساں ادارے رائٹرز کے مطابق سونے کے اس کموڈ کی ابتدائی بولی سونے کی موجودہ قیمت سے منسلک ہے جو نیلامی میں بڑھ سکتی ہے۔
اس کموڈ کو اٹلی کے فنکار ماوریزیو کیٹیلن نے 2016 میں بنایا تھا، اسے 2016-2017 میں نیویارک کے گوگن ہائیم میوزیم میں نمائش کے لیے پیش کیا گیا تھا، اس طرح کا ایک اور فن پارہ 2019 میں برطانیہ کے بلین ہائم پیلس سے چوری ہونے کے بعد دوبارہ خبروں میں آیا، یہ نیلامی اس فن پارے کے واحد بچ جانے والے نسخے پر مشتمل ہے۔
کیٹیلن اپنے فن پاروں کے لیے مشہور ہیں جو اس بات کی جانچ کرتے ہیں کہ فن کیا ہے اور اس کی قیمت کیسے لگائی جاتی ہے، ان کا دیوار پر ٹیپ سے چپکایا ہوا کیلا ’کومیڈین‘ 2024 میں تقریباً 62 لاکھ ڈالر میں فروخت ہوا تھا۔
نیلامی کمپنی کے نائب چیئرمین ڈیوڈ گالپرن نے کہا کہ اس فن پارے کی نیلامی سونے کے وزن کے برابر قیمت سے شروع ہوگی، یہ فن پارہ 101.2 کلوگرام 18 قیراط سونے پر مشتمل ہے، آج کے اندازے کے مطابق اس کی مالیت تقریباً 10 ملین ڈالر کے قریب ہے۔
ڈیوڈ گالپرن کے مطابق چونکہ سونے کی قیمت میں اتار چڑھاؤ آتا رہتا ہے اس لیے نیلامی کی رات منگل 18 نومبر کو سونے کی مارکیٹ کے مطابق اس فن پارے کی ابتدائی بولی مقرر کی جائے گی۔