بھارتی پنجاب کے وزیر اعلیٰ کو لاہور میں عالمی پنجابی کانفرنس میں شرکت کی دعوت

بھارتی ریاست پنجاب کے وزیراعلیٰ بھگونت سنگھ مان کو لاہور میں منعقد ہونے والی ‘عالمی پنجابی کانفرنس’ میں شرکت کی باضابطہ دعوت دی گئی ہے، تاہم انہوں نے شدید خدشہ ظاہر کیا ہے کہ بھارتی حکومت انہیں پاکستان کے دورے کی اجازت نہیں دے گی۔

بھارتی میڈیا کی رپورٹ کے مطابق، بھگونت مان نے مشرقی پنجاب کی اسمبلی کے اجلاس کے دوران ایوان کو بتایا کہ کانفرنس کے منتظمین، خصوصاً معروف پنجابی شاعر بابا بشیر حسین ناظمی نے انہیں لاہور آنے کی دعوت کے ساتھ میزبانی کی پیشکش کی ہے۔ وزیراعلیٰ بھگونت مان نے طنزیہ انداز میں گفتگو کرتے ہوئے کہا کہ جب مودی حکومت انہیں فرانس اور جاپان جیسے ممالک کے سرکاری دوروں کی اجازت نہیں دیتی تو وہ پاکستان جانے کی اجازت کیسے دے سکتی ہے؟

انہوں نے مزید کہا کہ دونوں پنجابوں کی ثقافت اور زبان مشترک ہے اور وہ خود بھی اس کانفرنس میں شرکت کے خواہش مند ہیں۔ اجلاس کے دوران مشرقی پنجاب اسمبلی کے اسپیکر کلتار سنگھ سندھواں نے کہا کہ اگر وزیراعلیٰ کو اجازت ملی تو وہ بھی ارکانِ اسمبلی کے ہمراہ لاہور جائیں گے، جس پر بھگونت مان نے تجویز دی کہ وہ چاہتے ہیں کہ اسپیکر، حکومتی ارکان اور اپوزیشن سمیت تمام ارکان اسمبلی کرتارپور صاحب جائیں اور حاضری دیں، بشرطیکہ کرتارپور راہداری کھول دی جائے۔

واضح رہے کہ لاہور میں عالمی پنجابی کانفرنس 27 سے 29 نومبر تک منعقد ہوگی۔ اس کانفرنس کا اہتمام پنجابی پرچار آرگنائزیشن، پنجابی لہر اور پنجاب انسٹی ٹیوٹ آف لینگویج، آرٹ اینڈ کلچر (پلاک) کے اشتراک سے کیا جا رہا ہے، جس میں دنیا کے 9 ممالک سے مندوبین کی شرکت متوقع ہے۔