آزاد کشمیر: سکول جانے والی گاڑی دریائے نیلم میں گر گئی، 4 بچے جاں بحق

آزاد کشمیر کی وادیِ نیلم میں ایک انتہائی المناک حادثہ پیش آیا ہے جہاں اسکول جانے والے بچوں کی گاڑی بے قابو ہو کر سڑک سے نیچے گہری کھائی میں گرنے کے نتیجے میں چار بچے جاں بحق جبکہ چار افراد شدید زخمی ہو گئے۔

اطلاعات کے مطابق یہ حادثہ وادیِ نیلم کے علاقے نگدر میں گھوڑے نکے کے مقام پر اس وقت پیش آیا جب تیز رفتار جیپ موڑ کاٹتے ہوئے بے قابو ہو کر تقریباً سو فٹ نیچے کھائی میں جا گری۔ حادثے میں جاں بحق ہونے والوں میں 12 سالہ حسنین ولد ظہور، 10 سالہ تیفور ولد مشکور، 16 سالہ علین دختر مشکور اور 2 سالہ معصوم بچہ زرید ولد ظہور شامل ہیں۔

حادثے میں زخمی ہونے والوں میں راشدہ بی بی (زوجہ ظہور)، 50 سالہ مشکور ولد ظفر اللہ، 9 سالہ عبداللہ ولد مشکور اور 12 سالہ ایمن دختر ظہور شامل ہیں۔ پولیس کے مطابق حادثے کا شکار ہونے والے تمام افراد کا تعلق ایک ہی خاندان سے ہے۔

واقعے کی اطلاع ملتے ہی مقامی افراد اور پولیس کی نگران ٹیمیں فوری طور پر موقع پر پہنچ گئیں اور ریسکیو آپریشن شروع کیا۔ تمام زخمیوں اور لاشوں کو کھائی سے نکال کر ابتدائی اور طبی امداد کے لیے ڈی ایچ کیو (DHQ) اسپتال آٹھمقام منتقل کر دیا گیا ہے۔