پاکستان اور جنوبی افریقہ کے درمیان فیصلہ کن ون ڈے میچ آج کھیلا جائے گا

پاکستان اور جنوبی افریقا کے درمیان تین ون ڈے میچوں کی سیریز کا تیسرا اور فیصلہ کن میچ ہفتہ کو اقبال اسٹیڈیم فیصل آباد میں کھیلا جائے گا۔ سیریز اس وقت ایک ایک میچ سے برابر ہے، اور یہ میچ فاتح ٹیم کا تعین کرے گا۔

پہلے ون ڈے میں پاکستان نے سنسنی خیز مقابلے کے بعد جنوبی افریقہ کو دو وکٹوں سے شکست دی۔جنوبی افریقہ نے پہلے بیٹنگ کرتے ہوئے 263 رنز بنائے، جواب میں پاکستان نے ہدف آخری اوور میں حاصل کرلیا۔پاکستان کی جانب سے سلمان علی آغا نے 62 رنز کی شاندار اننگز کھیلی، جبکہ شاداب خان اور افتخار احمد نے بھی قیمتی رنز جوڑے۔
بالنگ میں شاہین شاہ آفریدی اور نسیم شاہ نے دو، دو وکٹیں حاصل کیں۔

سیریز کے دوسرے میچ میں جنوبی افریقہ نے شاندار کارکردگی دکھاتے ہوئے پاکستان کو 8 وکٹوں سے شکست دی۔پاکستان نے پہلے بیٹنگ کرتے ہوئے 269 رنز بنائے، جہاں بابر اعظم نے 74 اور محمد رضوان نے 52 رنز اسکور کیے۔جواب میں جنوبی افریقہ کے اوپنرز نے شاندار آغاز فراہم کیا۔ کوئنٹن ڈی کوک نے ناقابل شکست 123 رنز کی شاندار اننگز کھیلی جبکہ ریزا ہینڈرکس نے 68 رنز بنائے۔پاکستان کی جانب سے صرف شاہین آفریدی اور محمد وسیم جونیئر ایک ایک وکٹ حاصل کرسکے۔سیریز اب ایک ایک سے برابر ہے، اور تیسرا ون ڈے میچ فیصلہ کن معرکہ ثابت ہوگا۔دونوں ٹیمیں بھرپور تیاری کے ساتھ میدان میں اتریں گی۔ شائقین کرکٹ فیصل آباد میں ایک اور دلچسپ مقابلے کے منتظر ہیں، جو سیریز کے فاتح کا فیصلہ کرے گا۔