ایران میں حکومت مخالف پُرتشدد مظاہرے، 50 ہلاکتیں؛ پاسدارانِ انقلاب کا اسرائیلی جاسوس پکڑنے کا دعویٰ

ایران میں 28 دسمبر سے جاری حکومت مخالف مظاہروں نے پُرتشدد شکل اختیار کرلی ہے، جہاں ہلاک ہونے والوں کی تعداد 50 تک جا پہنچی ہے۔ ہلاکتوں میں سیکیورٹی اہلکار بھی شامل ہیں، جبکہ 250 سے زائد افراد کو گرفتار کیا جا چکا ہے۔

ایران کی پاسدارانِ انقلاب نے ملک گیر مظاہروں کے دوران امن و امان کی بحالی کی کارروائیوں میں ایک مبینہ اسرائیلی جاسوس کو گرفتار کرنے کا دعویٰ کیا ہے۔ پاسدارانِ انقلاب کے انٹیلی جنس ونگ کے مطابق ایک غیر ملکی شہری کو اسرائیل کے لیے جاسوسی کے الزام میں حراست میں لیا گیا ہے۔

ایرانی میڈیا کے مطابق سپریم لیڈر آیت اللہ خامنہ ای سمیت اعلیٰ حکام متعدد بار یہ دعویٰ کر چکے ہیں کہ حالیہ مظاہروں میں غیر ملکی ہاتھ ملوث ہو سکتا ہے۔ حکام کا کہنا ہے کہ گرفتار ملزم حساس معلومات اکٹھی کر کے اسرائیلی اداروں کو فراہم کرتا رہا، تاہم تاحال اس کی شناخت اور قومیت ظاہر نہیں کی گئی۔

یاد رہے کہ ایران میں یہ مظاہرے 28 دسمبر سے مہنگائی، معاشی بدحالی اور بے روزگاری کے خلاف شروع ہوئے تھے، جو اب شدت اختیار کر چکے ہیں۔

ادھر ایرانی اٹارنی جنرل نے مظاہرین کو خبردار کرتے ہوئے کہا ہے کہ فسادی “دشمنِ خدا” ہیں، جن کے لیے قانون میں سزائے موت کی گنجائش موجود ہے۔