برطانیہ: 97 سالہ خاتون نے وِنگ واکنگ کا اپنا ہی ریکارڈ توڑ دیا

برطانیہ سے تعلق رکھنے والی 97 سالہ بیٹی برومیج (Betty Bromage) نے فالج کے حملے کے محض 01 سال بعد چلتے ہوئے طیارے کے پروں پر سوار ہو کر (وِنگ واکنگ) اپنا ہی گینیز ورلڈ ریکارڈ توڑ دیا ہے۔ چیلٹنہم کی رہائشی بیٹی برومیج نے 97 سال اور 127 دن کی عمر میں آر ایف سی رینڈ کومب ایئر فیلڈ میں اس خطرناک مہم کا کامیاب مظاہرہ کر کے دنیا کی معمر ترین وِنگ واکر کا اعزاز برقرار رکھا۔

برطانوی نشریاتی ادارے (BBC) سے گفتگو کرتے ہوئے ان کا کہنا تھا کہ اگر وہ ایسے ایڈونچر نہ کریں تو ان کی زندگی بور ہو جائے گی۔ انہوں نے اس منفرد کارنامے کے ذریعے چیلٹنہیم جنرل ہاسپٹل کے اسٹروک یونٹ کے لیے عطیات اور فنڈز بھی جمع کیے، جہاں اگست 2025 میں ان کا فالج کا علاج ہوا تھا۔