ویلز میں 3 ہزار سال قدیم سونے کا کنگن دریافت

شمالی ویلز کے کاؤنٹی گوائنیڈ کے علاقے لانووخلین میں میٹل ڈیٹیکٹر کے ذریعے ایک زرعی زمین میں تلاش کے دوران تقریباً 3 ہزار سال قدیم سونے کا نایاب کنگن (Bracelet) دریافت ہوا ہے۔ ادریس تھامس نامی شہری، جنہوں نے محض دو سال قبل میٹل ڈیٹیکٹر سے تلاش کا شوق شروع کیا تھا، کو تلاش کے دوران 20 منٹ کے اندر زمین سے دھاتی سگنل ملا۔ کھدائی پر ابتدا میں انہوں نے اسے ٹِن فوائل کا ٹکڑا سمجھا، تاہم بعد میں چمکدار سونے کی جھلک پر انکشاف ہوا کہ یہ ہزاروں سال پرانی تاریخی باقیات ہے۔

آثارِ قدیمہ کے ماہرین نے معائنے کے بعد تصدیق کی ہے کہ دریافت ہونے والا یہ زیور کانسی کے دور (Bronze Age) سے تعلق رکھتا ہے جس میں 92.8 فیصد خالص سونا موجود ہے۔ ماہرین اور محققین نے اس انوکھی دریافت کو انتہائی شاندار قرار دیا ہے اور اس کی مالیاتی قدر کا تخمینہ 15 ہزار سے 20 ہزار برطانوی پاؤنڈز کے درمیان لگایا ہے۔ قانونی انکوائری کے بعد اس نایاب تاریخی زیور کو باقاعدہ طور پر قومی خزانہ (Treasure) قرار دے دیا گیا ہے، جبکہ دریافت کنندہ ادریس تھامس نے اس غیر معمولی کامیابی پر شدید حیرت اور مسرت کا اظہار کیا ہے۔