آخری رسومات کے وقت خاتون زندہ ہو گئیں، خاندان میں خوشی کی لہر دوڑ گئی

بھارتی ریاست مہاراشٹر کے ناگپور ضلع میں ایک حیرت انگیز واقعہ پیش آیا، جب 103 سالہ بزرگ خاتون گنگابائی سکھارے کو مردہ سمجھ کر آخری رسومات کی تیاریاں کی جا رہی تھیں، تب اچانک ان میں زندگی کے آثار نمودار ہوئے۔

خاتون کچھ عرصے سے بیمار تھیں اور بستر پر تھیں۔ اہل خانہ نے انہیں شام کے وقت حرکت نہ کرنے پر مردہ سمجھا اور اگلے دن صبح تک رسومات کی تمام تیاری مکمل کر دی۔

رسومات کے دوران ان کے پوتے راکیش سکھارے نے محسوس کیا کہ ان کے پاؤں کی انگلی ہل رہی ہے۔ فوری طور پر سب کو بتایا گیا، اور جب ناک سے روئی نکالی گئی تو گنگابائی نے گہری سانس لی۔

ڈاکٹروں نے معائنہ کیا اور تصدیق کی کہ وہ خیریت سے ہیں۔ اتفاق سے اسی دن ان کی 103 ویں سالگرہ بھی تھی، جس کے موقع پر اہل خانہ نے کیک کاٹ کر جشن منایا۔