چین: لڑکے نے لاکھوں ڈالر مالیت کا سونے کا تاج توڑ ڈالا

چین میں ایک بچے نے نمائش کے دوران انتہائی قیمتی سونے کے تاج کو حادثاتی طور پر توڑ دیا۔ ساؤتھ چائنا مارننگ پوسٹ کے مطابق دو کلو وزنی گولڈن فینکس کراؤن کی مالیت تقریباً 2 لاکھ 80 ہزار ڈالر تھی۔

واقعہ اس وقت پیش آیا جب نوجوان اپنے والدین کے ہمراہ نمائش میں گیا اور غیر ارادی طور پر تاج سے ٹکرا گیا، جس کے نتیجے میں تاج ٹکڑے ٹکڑے ہوگیا۔ ژینگ کائیے نامی ایک انفلوئنسر، جس کے 1 کروڑ 36 لاکھ فالوورز ہیں، نے بتایا کہ یہ تاج ان کے شوہر نے شادی کے تحفے کے طور پر بنایا تھا۔

سوشل میڈیا پر شیئر کی گئی فوٹیج میں دیکھا جا سکتا ہے کہ بچہ اپنی والدہ کے ساتھ تاج دیکھنے آتا ہے، اور جب وہ حفاظتی کیس کو صاف کرنے کے لیے چھوتا ہے تو تاج الٹ کر زمین پر گر کر ٹوٹ جاتا ہے۔

ژینگ کائیے نے کہا کہ یہ واقعہ ان کے لیے بہت مایوس کن تھا کیونکہ تاج محبت کی نشانی تھا اور ان کے لیے خاص اہمیت رکھتا تھا۔ جوڑے کا خیال ہے کہ یہ واقعہ ان کی شادی کے لیے بد شگنی کا سبب بن سکتا ہے۔