پاکستان میں پولیو وائرس کے پھیلاؤ میں تشویشناک اضافہ

اسلام آباد: پاکستان میں پولیو وائرس کے پھیلاؤ میں تشویشناک حد تک اضافہ دیکھا گیا ہے۔ قومی انسداد پولیو مرکز (این سی او سی) کے مطابق اسلام آباد اور چاروں صوبوں کے سیوریج نمونوں میں پولیو وائرس کی تصدیق ہوئی ہے۔

ملک بھر کے 87 اضلاع سے 127 سیوریج سیمپلز جمع کیے گئے، جن کی لیبارٹری ٹیسٹنگ قومی ادارہ صحت اسلام آباد میں کی گئی۔ نتائج کے مطابق 40 سیوریج نمونے پولیو وائرس کے لیے پازیٹو جبکہ 87 نمونے نیگیٹو قرار پائے۔

صوبہ بلوچستان کے 2، خیبرپختونخوا کے 8، پنجاب کے 6، سندھ کے 23 اور وفاقی دارالحکومت اسلام آباد میں 1 نمونہ پازیٹو جبکہ 4 نیگیٹو رپورٹ ہوئے۔ آزاد کشمیر اور گلگت بلتستان کے تمام نمونے نیگیٹو رہے۔

سیوریج نمونے دسمبر 2025 میں حاصل کیے گئے تھے۔ این سی او سی نے کہا کہ مؤثر ویکسینیشن کے باعث ماحولیاتی نمونوں اور پولیو کیسز میں واضح کمی کا رجحان ہے، تاہم پھیلاؤ پر نظر رکھنا ضروری ہے۔