کتنے فیصد پاکستانی خریداری میں اے آئی سے مدد لیتے، رپورٹ آ گئی

کراچی: ڈیجیٹل ادائیگیوں کی عالمی معروف کمپنی ’ویزا‘ کے سالانہ ’سٹے سکیور 2026‘ مطالعے میں انکشاف ہوا ہے کہ پاکستان میں 82 فیصد صارفین اپنی آن لائن خریداری میں مدد حاصل کرنے کے لیے مصنوعی ذہانت (AI) کا استعمال کر رہے ہیں۔ ویک فیلڈ ریسرچ کے تعاون سے 17 ممالک میں کیے گئے اس سروے کے مطابق، 93 فیصد پاکستانی صارفین کا ماننا ہے کہ اے آئی نے آن لائن شاپنگ کو تیز اور انتہائی آسان بنا دیا ہے، جہاں لوگ قیمتوں کے موازنہ، مصنوعات کے ریویوز اور تحائف کے انتخاب کے لیے ان ٹولز کا رخ کرتے ہیں۔ تاہم، فائنل پیمنٹ اور چیک آؤٹ کے مرحلے پر اعتماد کی کمی تاحال برقرار ہے اور صرف 42 فیصد صارفین ہی اے آئی ایجنٹس کے ذریعے ادائیگی مکمل کرنے پر آمادہ نظر آتے ہیں۔

رپورٹ کے مطابق پاکستان میں سوشل کامرس کا رجحان بھی تیزی سے بڑھا ہے اور 82 فیصد صارفین سوشل میڈیا پلیٹ فارمز کے ذریعے خریداری کر چکے ہیں، لیکن اس کے ساتھ ہی مالیاتی فراڈ کے واقعات میں بھی خطرناک حد تک اضافہ ہوا ہے۔ گزشتہ ایک سال کے دوران 55 فیصد صارفین کسی نہ کسی ڈیجیٹل دھوکہ دہی کا شکار ہوئے، جن میں سے 44 فیصد واقعات براہِ راست سوشل میڈیا پر پیش آئے۔ اس کے علاوہ بچوں کی آن لائن حفاظت کے حوالے سے 77 فیصد صارفین نے تشویش کا اظہار کیا کہ بچے فراڈ کی شناخت نہیں کر پاتے، جبکہ 33 فیصد نے بچوں کو آن لائن گیمنگ یا شاپنگ کے دوران متاثر ہوتے دیکھا۔ ویزا کی سینئر وائس پریزیڈنٹ اور گروپ کنٹری منیجر (شمالی افریقہ، لیونٹ اور پاکستان) لیلا سرحان کا کہنا ہے کہ اے آئی اور سوشل کامرس صارفین کے انداز کو یکسر بدل رہے ہیں، لیکن اس ڈیجیٹل ترقی کو برقرار رکھنے کے لیے آن لائن تحفظ اور صارفین کے اعتماد کو بحال کرنا ناگزیر ہے۔