جنگ بندی کے باوجود غزہ پر اسرائیلی حملے جاری، 6 فلسطینی شہید

غزہ کی پٹی پر جنگ بندی کے معاہدے کے باوجود اسرائیلی افواج کے حملے تھم نہ سکے، اور مختلف علاقوں میں تازہ ترین بمباری و ڈرون حملوں کے نتیجے میں مزید 6 فلسطینی شہید اور 20 افراد زخمی ہو گئے ہیں۔

عرب میڈیا کی رپورٹ کے مطابق، جنوبی غزہ کے علاقے خان یونس میں الرشید اسٹریٹ پر سفر کرتی ہوئی ایک گاڑی کو اسرائیلی ڈرون نے نشانہ بنایا۔ اس تباہ کن ڈرون حملے کے نتیجے میں 4 فلسطینی موقع پر ہی شہید ہو گئے جبکہ 16 افراد شدید زخمی ہوئے۔ خان یونس کے ہی دوسرے علاقے ‘المواصی’ میں بے گھر ہونے والے مظلوم فلسطینیوں کے خیموں پر بھی اسرائیل کی جانب سے حملہ کیا گیا، جس میں مزید 2 فلسطینی شہید اور متعدد افراد زخمی ہوئے۔

 بین الاقوامی رپورٹس کے مطابق، غزہ پر اسرائیلی پابندیاں پہلے سے کہیں زیادہ سخت ہو چکی ہیں، جس کے باعث ہسپتالوں اور پناہ گزین کیمپوں میں زندگی بچانے والے ضروری طبی سامان اور ادویات کی شدید قلت برقرار ہے، جس سے زخمیوں کے علاج معالجے میں شدید مشکلات پیش آ رہی ہیں۔

 غزہ کی وزارتِ صحت کی جانب سے جاری کردہ تازہ ترین اعداد و شمار کے مطابق، اکتوبر 2025ء سے لے کر اب تک کے حملوں میں 1 ہزار 72 فلسطینی شہید اور 3 ہزار 463 زخمی ہو چکے ہیں۔ جبکہ اکتوبر 2023ء سے جاری اس طویل جنگ میں اب تک شہداء کی مجموعی تعداد 73 ہزار 98 تک پہنچ گئی ہے اور زخمی ہونے والے فلسطینیوں کی تعداد 1 لاکھ 73 ہزار 571 ہو چکی ہے۔