ایران کبھی بھی جوہری ہتھیار حاصل نہیں کر سکے گا: ٹرمپ کا ایک بار پھر دعویٰ

امریکی صدر ڈونلڈ ٹرمپ نے ایران کے حوالے سے اپنے سخت عزم کا اعادہ کرتے ہوئے دوٹوک الفاظ میں کہا ہے کہ ایران کبھی بھی جوہری ہتھیار حاصل نہیں کر سکے گا۔

امریکہ میں ایک تقریب سے خطاب کرتے ہوئے صدر ڈونلڈ ٹرمپ کا کہنا تھا کہ امریکی فوج دنیا کی بہترین اور طاقتور ترین فوج ہے، جس نے عسکری میدان میں ایران کو واضح شکست دی۔ انہوں نے تہران کے ساتھ حالیہ صورتحال پر تبصرہ کرتے ہوئے کہا کہ اگرچہ ایران کے ساتھ اب معاملات بہتر انداز میں آگے بڑھ رہے ہیں، لیکن جوہری ہتھیاروں کی عدم فراہمی پر امریکہ کا مؤقف برقرار ہے اور ایران کو یہ ہدف کبھی حاصل نہیں کرنے دیا جائے گا۔

امریکی صدر نے اپنی حکومت کی کامیاب کارکردگی کا تذکرہ کرتے ہوئے دعویٰ کیا کہ امریکی فورسز نے صرف ایران ہی نہیں بلکہ وینزویلا میں بھی بہترین اور شاندار کارکردگی کا مظاہرہ کیا ہے۔

معیشت اور کاروباری ماحول پر بات کرتے ہوئے ڈونلڈ ٹرمپ نے اپنی معاشی پالیسیوں کی تعریف کی۔ انہوں نے کہا کہ انہوں نے اقتدار میں آنے کے بعد پیش گوئی کی تھی کہ چار سال کے اندر امریکی اسٹاک مارکیٹ ملکی تاریخ کی بلند ترین سطح پر پہنچ جائے گی، لیکن ان کی بہترین معاشی حکمتِ عملی کے باعث اسٹاک مارکیٹ کا یہ بڑا ہدف صرف ایک سال کے اندر ہی حاصل کر لیا گیا، جو کہ ان کی انتظامیہ کی ایک بڑی کامیابی ہے۔