امریکا نے عراق کو امریکی ڈالر کی ترسیل معطل کر دی

ٹرمپ انتظامیہ کی جانب سے عراق کے حوالے سے ایک سخت اقتصادی اور عسکری پالیسی سامنے آئی ہے، جس کے تحت امریکہ نے عراق کو ڈالر کی ترسیل روکنے کے ساتھ ساتھ سکیورٹی تعاون کے پروگرام بھی معطل کر دیے ہیں۔ امریکی اخبار وال سٹریٹ جرنل کے مطابق، اس فیصلے کا بنیادی مقصد عراق میں موجود ایران کی حمایت یافتہ ملیشیاؤں پر دباؤ بڑھانا اور ان کے مالیاتی ذرائع کو محدود کرنا ہے۔

رپورٹ میں انکشاف کیا گیا ہے کہ اس باقاعدہ معطلی سے قبل امریکی محکمہ خزانہ نے 50 کروڑ ڈالر مالیت کے کرنسی نوٹوں سے لدے ایک کارگو طیارے کو بھی روک دیا تھا۔ یاد رہے کہ یہ رقم عراق کے اپنے تیل کی فروخت سے حاصل شدہ آمدنی تھی جو نیویارک کے فیڈرل ریزرو بینک میں جمع تھی، مگر اب امریکہ نے اس کی واپسی روک کر عراقی مالیاتی نظام کے لیے شدید مشکلات پیدا کر دی ہیں۔