ایران میں فوجی کارروائی میں مصنوعی ذہانت کے اہم کردار کا انکشاف

امریکا اور اسرائیل کی ایران میں فوجی مہم میں مصنوعی ذہانت (Artificial Intelligence) نے کلیدی کردار ادا کیا ہے۔

رپورٹ کے مطابق پہلے 24 گھنٹوں میں ایک ہزار اہداف پر حملوں کے لیے اے آئی نظام کی مدد لی گئی جبکہ امریکی فوج نے جنگی کارروائیوں میں جدید ترین اے آئی ٹیکنالوجی استعمال کی۔

امریکی اخبار کے مطابق جنگی استعمال کی شرائط کے حوالے سے متعلقہ کمپنی اور امریکی حکومت کے درمیان سخت مذاکرات بھی ہوئے، کیونکہ اب اے آئی ٹیکنالوجی عسکری فیصلوں میں مرکزی حیثیت اختیار کرتی جا رہی ہے۔ رپورٹ میں بتایا گیا کہ ایران پر ممکنہ حملے سے قبل اے آئی سسٹم نے سیکڑوں اہداف کی نشاندہی کی۔

رپورٹ میں کہا گیا ہے کہ مصنوعی ذہانت نے ہفتوں پر محیط جنگی منصوبہ بندی کو لمحوں میں تبدیل کر دیا۔ یہی ٹیکنالوجی دہشت گردی کے منصوبے ناکام بنانے میں بھی استعمال ہو رہی ہے جبکہ وینزویلا کے صدر کو پکڑنے والے ایک آپریشن میں بھی اے آئی کی مدد شامل تھی۔

امریکی اخبار کے مطابق فوج اور متعلقہ کمپنی کے درمیان خودکار ہتھیاروں اور نگرانی کے اختیارات پر اختلافات موجود ہیں، تاہم متبادل نظام آنے تک امریکی فوج موجودہ اے آئی ٹیکنالوجی استعمال کرتی رہے گی۔

رپورٹ میں مزید کہا گیا کہ امریکی کمانڈرز جنگی کارروائیوں میں مصنوعی ذہانت پر تیزی سے انحصار کرنے لگے ہیں اور ناٹو سمیت دنیا کی کئی فوجیں بھی اسی طرز کے اے آئی نظام اپنا رہی ہیں۔